Puerto Princesa City… Upang lalong mapasigla ang sektor ng agrikultura sa lalawigan ng Palawan, at bilang pagsuporta sa HEAT program ng Pamahalaang Panlalawigan, ipinalabas ni Gob. Baham M
itra ang Executive Order No. 08, series of 2011 na may titulong “Creating Bagong Sigla sa Agrikultura Program (BSAP) for special provincial government development concerns and creating corresponding special positions constituting thereof.”
Ang pagpapalabas ng naturang kautusan ni Gob. Baham ay bunsod ng ipinasang Provincial Ordinance No. 1199 at Resolution No. 8800-11 ng Sangguniang Panlalawigan na sumusuporta sa pagbuo ng Bagong Sigla sa Agrikultura Program na pangangasiwaan sa ilalim ng tanggapan ng gobernador.
Sa bisa ng kautusan na nilagdaan ng Gobernador noong ika-24 ng Pebrero, taong kasalukuyan, isang Program Management Office ang binuo upang pangasiwaan ang BSAP. Ang PMO ay pamumunuan ng program management officer kasama ang assistant program management officer, budget officer, administrative assistant at liaison officers. Maglalagay din ng Field Operating Unit sa norte at sur ng lalawigan.
Itinatalaga din ng gobernador bilang focal persons ng BSAP ang isang kawani mula sa mga tanggapan ng Office of the Provincial Agriculturist at Provincial Cooperative Development Office.
Samantala, ilan naman sa mga gagampanang responsibilidad ng BSAP ay ang sumusunod: tukuyin ang mga magsasaka na may mga lupaing pansakahan at i-organisa sila sa isang produktibong kooperatiba na papasok sa large-scale cassava production; maglaan ng suporta at tulong teknikal sa mga magsasaka upang makamit nila ang mas mataas na produksiyon; bumuo ng ugnayan sa pagitan ng mga kooperatiba at mga institusyon na naglalaan ng tulong puhunan, grants at iba pang suportang pinansiyal.
Samantala, sinimulan na rin ng PMO ang pagganap ng kanilang tungkulin bilang pagtupad ng BSAP. Si G. Leo Palao ang tumatayong program management officer ng BSAP. (PIO/PIA4B-Palawan)
Palawan News Online 